Түркмөнстандын президенти белекке берген аргымакты Бишкекке жеткиришти

Кыргызстанга Түркмөнстандын президенти мамлекет башчысы Садыр Жапаровго берген белегин алып келишти. Бул тууралуу Barometr.kgге жеке булактар маалымдашты.

Белекти Бишкекке унаа менен жеткиришкен.

Маектештин айтымында, Гурбангулы Бердымухамедов Садыр Жапаровго англиялык породадагы асыл тукум аргымакты белекке берген.

Эскерте кетсек, акыркы айда Садыр Жапаров Түркмөнстанга эки ирет барган, 28-июлда ал Ашхабад шаарына расмий сапар менен барса, 5-6-августта Түркмөнстанга Борбор Азиянын президенттеринин жолугушуусуна катышуу үчүн барган.

Редакциянын алган маалыматына караганда, түркмөн президенти Садыр Жапаровго аргымакты Ашхабад шаарына жасаган иш сапардын маалында берген.

Эки өлкөнүн президенттеринин басма сөз кызматтары бул тууралуу эмнегедир расмий билдиришкен эмес.

Кыргызстандын президентинин басма сөз катчысы Эрбол Султанбеков Бердымухамедов Садыр Жапаровго аргымак берген жок деп маалымдады.  

“Аргымак беришкен жок”,-деп билдирди ал Barometr.kg редакциясына.