Тогуз-Тородогу катуу шамал 16 үйдүн жана бир мектептин шиферин учуруп кетти (Сүрөт)

Тогуз-Торо районунда катуу шамал катталып үйлөрдүн чатырларын учуруп кетти. Бул тууралуу “Барометрге” КР ӨКМ басма сөз кызматы билдирди.

Кечээ, Жалал-Абад облусунун Тогуз-Торо районунда саат 16:30 чамасында катуу шамал катталып (шамалдын ылдамдыгы такталууда), Каргалык айыл аймагына караштуу Т. Мойдунов атындагы орто мектебинин 114 даана шиферин, 7 турак үйдүн 26 даана шиферин жана 122 чарчы метр тунукесин, 3 чарбалык курулуштардын 140,8 чарчы метр чатырын учурган.

Ошондой эле Тогуз-Торо айыл аймагында 9 турак үйдүн 248,5 чарчы метр тунукесин жана 12 даана шиферин учуруп кеткен. Шамалдын кесепетинен адам өмүрүнө зыян келген жок.

Учурда КР ӨКМнин Тогуз-Торо райондук бөлүмүнөн ыкчам тобу жана Жарандык коргонуу комиссиясы тарабынан тактоо иш-чаралары жүргүзүлүүдө.