Сокулукта жаш кызга ыплас аракеттерди жасоого шектелип кошунасы кармалды

Сокулук районунда жашы жете элек кызга ыплас аракеттерди жасоого шектүү кармалды. Бул тууралуу Чүй ОИИБдин маалымат кызматына шилтеме берип “Барометр” билдирет. 

Маалым болгондой, 6-февралда милицияга наристенин апасы кайрылган. 

“Учурда кылмыш иши сотко жөнөтүлгөн. 
2023-жылдын 6-февралында Сокулук милициясына жаран Т.Н., 2022-жылдын декабрь айынан бери жаш кызына карата адепсиз жоруктарды жасап келе жаткан кошунасы «М» га чара көрүү өтүнүчү менен кайрылган.  

Аталган факт Сокулук РИИБге катталып, КР Кылмыш-жаза кодексинин 158-беренесинин (адепсиз жорук) негизинде кылмыш иши козголгон.    

Тергөө соттук-укуктук экспертизанын корутундусу даяр болгонго чейин уланган.    

2023-жылдын 25-апрелинде Сокулук районунун ИИБ кызматкерлери тарабынан ыкчам-иликтөө иш-чараларынын жүрүшүндө, ошондой эле тергөө амалдарынын жана экспертизанын корутундуларынын негизинде жаран 1980-жылы туулаган А.М.Б. шектүү катары кармалып, убактылуу кармоочу жайга киргизилген.     

Кылмышка шектүү жаран А.М.Б. КР Кылмыш-жаза кодексинин 158-беренеси (бузуктук аракеттер) боюнча айып тагылып, Сокулук райондук соту тарабынан камакка алуу түрүндөгү баш коргоо чарасы тандалган”, -деп айтылат маалыматта.