Россиялык блогерлер кыргызстандык таксистке унаа белек кылышты

Россиялык блогерлер Гусейн Гасанов менен Арутюн Назарян Москвада иштеген кыргызстандык таксистке унаа белек кылышты. Бул тууралуу алар өздөрүнүн Instagram баракчасына маалымдашты.

Социалдык тажрыйба жасап көргөн блогерлер, таксисттер көмөк көрсөтүп аларды акысыз салып кетеби деп сынап көрүшкөн. “Ким акысыз алып кетүүгө макул болсо, ал жаңы унаа алат”,-деп айткан блогер Гусейн Гасанов.

Бир нече таксист токтоп блогерлерди акысыз жеткирүүдөн баш тартышкан. Бирок кыргызстандык таксист макул болгон.

Салондо отургандарга айдоочу Кыргызстандан келгенин, унаага ижара акысын төлөрүн, айына 40 миңдей рубль иштеп табарын айткан. Анын үй-бүлөсү, эки баласы бар экени, кызына операция керектигин да билдирген.

Блогерлер унаа салонуна барышып таксистке Kia Rio унаасын белек кылышты.