Психологиялык “вампирлер” деген ким жана алардан кантип коргонуу керек?

Адам менен сүйлөшкөндө анын энергиясын алып кое турган адамдарды “психологиялык вампирлер” деп коюшат. Албетте бул термин илимий эмес, ошентсе да Россиянын белгилүү психологу, профессор Литвак психологиялык вампиризмге арналган чоң китеп чыгарган.  

Аталган китепке таянсак психологиялык вампир адамдарды эки типке бөлүшкөн. Алар: тынч жүрүп энергия алган адам жана ачык түрдө ызы-чуу салып энергия алган адам. Психологиялык тил менен алганда алардын өздөрүнө таандык кулк-мүнөздөрү бар. barometr.kg төмөндө аларды талдап көрдү.

Ызы-чуу салып энергия алган адам коомдук транспортко түшөбү, дүкөнгө барабы кичине бир нерсе туура эмес болуп калса чатак салат. Ага кенедей эле мүмкүндүк болсо болду  чуу салып өзүнүкүн жасатууга аракет кылат. Бир ирет жакын тааныш адам мындай вампирдин курмандыгы болгонун айтып беришкен. “Дордой” базарында соода кылган адамга ызы-чуу чыгарган адам барып көп сатылбаган буюмду таап алып, арзан баада сат деп суранган. Бирок ал арзан баада сатпай койгондо, эртеси дагы барып сураган. Ушундан кийин ал чатак салып, догурунуп, акыры соодагер экөө мушташканга чейин барган. Бул чатакты “вампир” сатып алуучунун кызы видеого тартып алган. Муштан бүткөн соң “вампир” кызы экөө кетип бара жатканда музга тайгаланып кызынын колу чыгып кеткен.Дал ушундай ызы-чуудан кийин “вампир” каарман, кызынын колун, өзүнүн жапа чеккенин айтып арыз жазып милицияга берип, бечара соодагерге догурунган.Окуянын соңу эмне менен бүттү? Соодагер милициялардан араң кутулуп бере турган буюмун бекер эле ал деп жатып тосмо арыз жаздырып, ага кошумча келтирилген чыгым үчүн деп акча берип араң кутулган.Жалпы айтканда ызы-чуулуу вампирлердин аракети ушундай болот.

Ал эми мындай адамдар жетекчи же башчы болуп калса өзүнө жакын турган кол алдындагыларга ыгы жок асылуу менен аларды чүнчүтүп энергиясын алат.Эң эле айласы кетип кыйкым таппаса пол жууган аялдарга, вахтерго, санитаркаларга, күзөтчүлөргө  асылат.

Мындай башчынын кол алдында иштегендер невроз, депрессия жана ар кандай психосоматикалык оорулар менен жабыркайт. Амалдуу вампир өзүнүн бул аракеттерин жумушка, бизнесе, тартипке кам көрүп жатам деген шылтоо менен ишке ашыра берет.Үй-бүлөдө мындай адамдар накта тирандар болушат. Аларды психологияда көбүнчө садист деп коюшат. Сизди талкалап кеткенден кийин валерьянка ичип отурсаңыз, ал күч-кубатка толуп жылмайып калат.Вампир адамдардын мындай түрү каргап-шилегенди, сөгүнгөндү, коркутканды, кемсинткенди-тактап айтканда психологиялык коргоону талкалай турган аспаптарды мыкты колдонгонду билет.

Диагноз: мындай адамдардын кулк-мүнөзүндөгү өзгөчөлүк бала чагында калыптанат, алар негизинен жашоодо ушунтип ызы-чуу кылбасам максаттарыма жетпейм деп эсептешет. Максаттарга жетүүнүн башка миңдеген жолдору бар экенине шектенип да коюшпайт. Чындыгында ызы-чуу салган вампир адамдын жан дүйнөсүндө жашоодон корккон кичинекей баланын жан дүйнөсү жашап жатат. Ал ушундай абалда эмне кыларын билбей чыргоо, ыйлаган, катуу корккон баланы элестетет.

Кеңеш: эгерде сизде ушундай мүнөздөр бар экенин байкасаңыз анда токтолуп, бул адаттардан кутулууга аракет кылыңыз. Жан дүйнөңүздөгү балалык таарынычтарды жазып, бирөөгө карата жек көрүүлөрдү алып салыңыз.Психологго кайрылып өзүңүздү өнүктүрүүнүн үстүндө иштеңиз. Айланадагылардын баары сиздин гана тегерегиңде чарк айланып турушун кааласаңыз катуу жаңылышасыз! Алардын да өз жашоосу бар, Өзүңүзгө жоопкерчилик алыңыз!

Экинчи типтеги вампир адамдар-тынч жүрүп тымызын энергия алгандар. Мындай адамдар наалыганга, өзүнүн оору сыркоосу, кыйынчылыктары тууралуу айтып энергия соргонго ыңгайлашкан.Сиздин убактыңызды алып жатканын билбей өзүнүн арыз-арманын айтып кар көчкүдөй сизди каптап кетмейин жаны тынчыбайт. Жашоодо бир байкуш болуп көрүнүп, дайыма депрессия болуп, айланасындагыларга таарынып, болор-болбогон нерселердин баарын ойлоп алып өзү ошондон коркуп жүрөт.

Диагноз: мындай адамдын да жан дүйнөсүндө өзүнө жоопкерчилик албаган кичинекей баланын жан дүйнөсү жашап жатат. Ал ушундай абал менен өзүнө көңүл бурдурууну каалайт.

Кеңеш:Сиздин жашооңузга сизден бөлөк тирек болчу адам жок! Жоопкерчилик жана эркти тарбиялаңыз.Адамдар менен мамил кылууну үйрөңүз!

Сиз вампир адам менен чогуу жашап же бирге иштеп жатсаңыз эмне кылуу керек? Биринчи кезекте анын ушундай адам экенин билиңиз. Анын бул системадан оңой менен баш тарпашын билиңиз. Талашып-тартышпаңыз! Чатакташпаңыз! Ыйлап сыктап келсе куткаруучу болбоңуз! Алар сиз жок жерде деле өз маселелерин чечип келишкен, чечип алышат.

Жакын адамыңыз вампир болсо аны менен мамилени алыс кармап, чек араны бөлүнүз! Ушул чектен өтсөң болбойт деген белгини бериңиз! Антпегенда анын курмандыгы болуп калышыңыз толук ыктымал!