Нарын театрынын режиссёру Шамбет Мендебаиров 51жашында каза болду

Нарын театрынын режиссёру Шамбет Мендебаиров  дүйнө салды. Бул тууралуу маданият министрлигинин маалыматына шилтеме берип “Барометр” билдирет. 

Маалым болгондой, режиссёр кече, 1-май күнү мезгилсиз бул дүйнө менен кош айтышкан. 

“М. Рыскулов атындагы Нарын облустук академиялык музыкалуу-драма театрынын режиссёр-коюучусу Мендебаиров Шамбет Кенжегулович 51 жаш курагында 2023-жылдын  1-майында мезгилсиз дүйнөдөн кайтты”, -леп айтылат маалыматта.                                                                                                

Мендебаиров Шамбет Кенжегулович 1972-жылдын  22-август айында Нарын облустуна караштуу Жумгал районунун  Чаек айылында  туулган.

1997-2003-ж.ж. Бишкек шаарындагы Б.Бейшеналиева атындагы Кыргыз мамлекеттик искусство институтунун «Театр жана кино» факультетинин «Режиссура» кафедрасын аяктаган. Окуу жайдын 5-курсунда окуп жаткан мезгилде Нарын облустук М.Рыскулов атындагы музыкалуу драма театрына келип, дипломдук ишине В.Дельмардын «Жашоо деген…»  спектаклин койгон.  

2012—жылдан ушул күнгө чейин М. Рыскулов атындагы Нарын облустук академиялык музыкалуу-драма театрында көркөм  жетекчи, режиссер-коюучу болуп эмгектенген.

Нарын театрында койгон спектаклдери :

В. Дельмар  « Жашоо деген …»,

Т.Якуб «Селим жана Ханыша»,

Ч.Калыбекова «Ботокөз»,

Ж.+зъбекова «Күйөө  сатам»,

К.Мамбетакунов «Укей»,

В.Сологуб «Назик жүрөк»,

М.Байжиев «Төрт адам»,

К. Иманалиев «Актриса»  

С. Рысбаев «Адам пери»,

К. Култегин «Шыпыргы өмүр»,

К. Осмоналиев «Көчмөндөр кагылышы»

Ага-ини Гримм «Бремендик музыканттар» балдар үчүн жомок;

«Щелкунчик» балдар үчүн жомок;

«Коркок жоокер» балдар үчүн жомок ж.б.

Сөөк узатуу тажиясы 3- май саат 11:00до Нарын шаарында Жаңы-жол аймагында өтөт.                                        

“Барометрдин” жалпы жамааты маркумдун үй-бүлөсүнө жана жакындарына көңүл айтып, аза кайгысын тең бөлүшөбүз.