Москвада 16-кабаттан кулап кетип аман калган кыздын өздүгү такталууда (видео)

Москвада көп кабаттуу үйдүн 16-кабатындагы батирдин терезесинен кулап кеткен кыз тирүү калды. Бул тууралуу "Известия" жазган маалыматка шилтеме берүү менен “Барометр” билдирет.

Маалыматка ылайык, 16-кабаттан кулап кеткен кыз кар күрткүлүрү топтолуп калган үйдүн маңдайындагы тосмого (козырек подъезда) кулап түшкөн. Учурда кыздын өмүрү менен дарыгерлердин алышып жатканы кабарланды.

Ал эми, соцтармакта окуяга байланыштуу видео тасма тарап жатат.

Видеодон батирдин терезесинен эки бутун сыртка чыгарып алып олтурган кызды көрүүгө болот. Көп өтпөй кыздын 16-кабаттан кулап кеткени тартылган.

Басылманын маалыматына ылайык, учурда окуянын чоо-жайы иликтенип, кыздын өздүгү такталууда.