Кыргызстан медалга ээ болот. Акжол Махмудов финалга чыкты

Кыргызстандн грек-рим күрөшү боюнча балбаны Акжол Махмудов Токиодо өтүп жаткан Олимпиада оюндарында финалга чыкты. Бул тууралуу “Барометр” маалымдайт.

Спортчу бүгүн, 2-августта 77 кг салмакка чейинки категорияда турнирге чыкты. Баардыгы болуп 16 спортчу  1/8 финалында беттешкен.

Махмудовдун биринчи атаандашы Тунистен келген Маафи Ладжед болду, аны кыргызстандык 11:0 эсебинде жеңип, чейрек финалга чыкты.

1/4 финалда Махмудов Азербайжандын балбаны Рафиг Хусейнов менен беттешти. Аны да 9:1 эсебинде жеңип алып, жарым финалга жолдомо алды.

Финалга чыгарда кыргыз балбаны Армениянын балбаны Карапет Чалян менен кармашып, 6:2 эсебинде жеңди.

Финалдык беттеште Махмудов Виктор Лоринц (Венгрия) менен килем үстүнө чыгат. Күрөш эртең, 3-августта болот.

Анын кандай аяктаганына карабай Кыргызстан Олимпиада оюндарында 2008-жылдан бери алгач ирет медалга ээ болот.