Кыргызстан ядролук куралды тыюу салуу жөнүндөгү келишимге кол койду

БУУнун Башкы Ассамблеясынын 80-сессиясынын Жогорку деңгээлдеги жумалыгынын алкагында Кыргыз Республикасы Ядролук куралды тыюу салуу жөнүндөгү Келишимге кол койду.

2025-жылдын 26-сентябрында Нью-Йорк шаарында Жээнбек Кулубаев Ядролук куралды толук жок кылуунун Эл аралык күнүнө арналган жогорку деңгээлдеги пленардык жыйында сөз сүйлөдү.

Өзүнүн кайрылуусунда министр Кулубаев ядролук куралдан арылуу жана аны жайылтпоого байланышкан маселелер Кыргыз Республикасынын тышкы саясатынын маанилүү багыттарынын бири экенин белгиледи.

Министр Кыргызстан ядролук куралды тыюу салуу жөнүндөгү Келишимге кол койгон мамлекеттердин катарына кошулганын жана бул кадам өлкөнүн эл аралык коопсуздукту жана жайылтпоону бекемдөө боюнча курсунун мыйзам ченемдүү уландысы экенин билдирди.

Ошондой эле министр Борбор Азиянын глобалдык коопсуздукту чыңдоого кошкон салымына өзгөчө көңүл буруп, Кыргыз Республикасы депозитарий болуп саналган Борбор Азиядагы Ядролук куралдан эркин аймак тууралуу келишимди баса белгиледи.