Кыргызстандын Эл артисти Жамал Сейдакматова дүйнөдөн кайтты

Кыргыз Республикасынын Эл артист  Жамал Сейдакматова каза болду. Бул тууралуу Маданият, маалымат, спорт жана жаштар саясаты министрлигинин маалымат кызматына шилтеме берип “Барометр” билдирет. 

2021-жылдын 16-февралында Кыргыз театр жана кино искусствосунун залкар таланты, дүйнөлүк чыгаан актриса, Кыргыз Республикасынын эл артисти, Токтогул атындагы мамлекеттик сыйлыктын лауреаты Жамал Сейдакматова узакка созулган катуу оорудан кийин 82 жаш курагында дүйнөдөн кайтты.

Жамал Сейдакматова 1939-жылдын 21- сентябрында Ысык-Көл  районунун Темир айылында жарык дүйнөгө келген.  Фрунзедеги №5- орто мектепти аяктап, Ленинграддагы Полиграфиялык институтка тапшырат. Табиятынан берилген шык, талант аны искусствого кайрып келет. Театр залкарлары Муратбек Рыскулов, Сабира Күмүшалиева, Даркүл Күйүковалардын көрөгөчтүгү менен 1956-жылы Кыргыз мамлекеттик академиялык драма театрына кабыл алынат. Келечектүү актрисанын таланты 1958-жылы тартылган "Алыскы тоолордо" көркөм тасмасында ролун аткаруу менен кеңири таанылган. Ошол күндөн өмүрүнүн акырына чейин улуу актриса катары талыбай эмгек кылуунун үлгүсүн жаратты. 

Кыргыз сахнасында В. Шекспирдин "Азоого чалмада" Катарина, "Отеллодо" Дездемона, Ч. Айтматовдун "Кылым карытар бир күндө" Найман эне Ж. Абдыкадыровдун "Олжобай менен Кишимжанда" Кишимжан, К. Мамбетакуновдун "Омар Хайямдын махабатында" Элпи, М. Байжиевдин" Төрт адам да" Нази, "Кыз күйөөдө" Гүлсүн, Б Жакиевдин "Күттүргөн жазда келээр" Зейнеп, М. Карим "Ай тутулган түндө" Шафак, Гогольдун "Үйлөнүүсүндө" Агафе Тихоновна, Ш. Садыбакасов "Ак боз ат" Эркайым сындуу этаптык образдарды жараткан.

Кыргыз ССРинин эл артисти, Токтогул атындагы мамлекеттик сыйлыктын лауреаты, КРдин эл артисти, II даражадагы «Манас» орденинин ээси, кыргыз маданиятынын өнүгүүсүнө опол тоодой салым кошуп, өмүрүн театр менен киного арнаган Жамал Сейдакматованын кино дүйнөсүндө жараткан жаркын элеси ар дайым кыргыз элинин эсинде түбөлүк сакталып калат.