КСДП кезексиз съезд өткөрүү тууралуу маалыматты четке какты

КСДП партиясынын мурдагы мүчөсү Сагынбек Абдрахмановдун кезексиз жыйынга чакыруу тууралуу билдирүүсү эч кандай негизсиз. Бул тууралуу партиянын расмий өкүлү Кундуз Жолдубаева билдирди.

Сагынбек Абдрахманов буга чейин социал-демократтардын кезексиз жыйынына чакыруу даярдыктары башталганын жана анда Алмазбек Атамбаевди партиянын курамынан чыгаруу маселеси карала турганын айткан эле.

“Сагынбек Абдрахманов КСДПдан 2017-жылдын 9-августунда XVI съезддин чечимине баш ийбегендиги үчүн чыгарылган. Ал партиядан бөлүнүп, ошол кезде КСДПнын атынан чыккан талапкер Сооронбай Жээнбековго каршы иштерди жүргүздү деп партиялаштары тарабынан бааланган”,- деди Кундуз Жолдубаева.

Анын айтымында, Сагынбек Абдрахмановдун аракеттери партиянын чечимине карама-каршы келип, КСДПнын негизги максаттарына дал келбей тургандыгын саясий кенеш белгилеген. Анын уставына ылайык, Сагынбек Абдрахманов партиядан четтетилген.