Дастан Шаршеев: Нарында мектеп курганга 10 тонна цемент түшүрүп берүүгө даярмын

Чемпион кикбоксер Дастан Шаршеев соцтармактан кыргызстандыктарга кайрылды.

"Урматтуу элим, кечээ жакында ачылган контейнер мектеп тууралуу көп деле сөз жазбайын. Кыскасы, жүрөк оорута турган маселе болду. Ал жерге барган 6 чиновниктин өздөрүнүн балдары окуган мектеп тууралуу кимде кандай маалымат болсо, чыгаруунуздарды өтүнөм. Себеби, Президент айтып кеткендей "мамлекеттик кызматкер жеке байлык топтоо үчүн, мамлекеттик кызматка келбеши керек".  Алар өздөрүн кызыкчылыктарын, элдин кызыкчылыгынан өйдө койбош керек.  Айрыкча аким, айыл өкмөттөр карапайым элге жакын болгондуктан элдин көйгөйүн максималдуу түрдө чечүүгө милдеттүү деп эсептейм!   Мен өзүмдүн жоро-жолдошторум менен Кеңеш айылына 10 тонна цемент түшүрүп берүүгө даярмын. Кимге, кайсы жакка байланышка чыгаарыбызды билбей турабыз. Кайсыл жакка алып келип, түшүрүп бергиле десе алып барып беребиз. Көп түкүрсө көл болот, кимдин колунан дагы кандай жардам келсе, кол сунуңуздар!", - деп жазды чемпион.