Жээнбеков: Ар бир айтылган каалоо-тилектериңиздер мен үчүн кымбат

Экс-президент Сооронбай Жээнбеков анын өздүк майрамы менен куттуктап, каалоо-тилектерин айткан мекендештерге ыраазычылыгын билдирди. Бул тууралуу анын соцтармактагы расмий баракчасында жазылган маалыматка шилтеме берип "Барометр" билдирет.

"Урматтуу мекендештерим,

Сиздердин көпчүлүгүңүздөрдөн кечээ, 16-ноябрда менин дарегиме жылуу сөздөр менен бирге куттуктоолор айтылды, жазылды.

Ар бириңизге чын дилимден ыраазычылыгымды билдирем.

Мен үчүн айтылган ар бир каалоо-тилектериңер кымбат, өзгөчө маанилүү. Мага эмне кааласаңыздар, сиздерге да ошону каалайм.

Ар бир үйдө жакшылыктар көп болсун. Бекем ден соолукта болуңуздар.

Кыргызстаныбызды Жараткан Кудай колдосун!", - деп жазды экс-президент.

Эскерте кетсек, кече, 16-ноябрь экс-президент Сооронбай Жээнбеков 62 жашка толгон. Көптөгөн кыргызстандыктар мурунку ажону туулган күнү менен куттуктап, жашы сөздөрүн жазышкан.