Токмокто унаа даракты сүзүп, эки адам каза тапты

Чүй областынын Токмок шаарына жакын аймакта жол кырсыгы болду. Бул тууралуу Өзгөчө кырдаалдар министрлигинин басма сөз кызматынан кабарлашканын “Барометр” билдирет. 

Аталган маалыматка таянсак, бүгүн, 27-октябрда саат 07:52 чамасында Бишкек-Нарын-Торугарт жолунун 65-чакырымында «Мерседес-Бенц C 180» унаасынын айдоочусу рулду башкара албай калып, даракты барып сүзгөн.

Окуя болгон жерде №21 отряддын үч куткаруучусу иш алып барды.

Кырсыктан улам бир эркек жана бир аял каза тапты, дагы бир киши ар кандай жаракаттарды алды. Куткаруучулар каза тапкандардын денесин унаадан алып чыгышып, милиция кызматкерлерине өткөрүп беришти.

Жабырлануучу Токмок шаардык ооруканасына жеткирилди.