Сузакта жоголгон кызды издөөгө жүздөн ашык адам тартылды

Сузак районунда жоголгон тогуз жаштагы Сумая Хосилжанованы издөөгө 100дөн ашык адам тартылды. Бул тууралуу Жалал-Абад областынын ички иштер башкармалыгынын басма сөз кызматынан кабарлашканын “Барометр” маалымдайт.

Сузак райондук ички иштер бөлүмүнүн кызматкерлери 100дөн ашык ыктыярчылар менен биргеликте мектеп окуучусун издөө иштерин жүргүзүп жатат.

2012-жылы туулган Хосилжанова Сумайя Уткирбековна 18-ноябрда болжол менен саат 12:40та үйүнөн мектепке чыгып кеткен боюнча кайтып келген эмес.

Белгилери: бою 120-130 сантиметр, арык чырай, чачтары кыска кыркылган.

Башында ак жоолук, ак көйнөк, боз свитер, көк түстүү куртка, кызыл түстүү бут кийим кийип жүргөн.

Сумая Хосилжанова тууралуу маалымат билгендер болсо 102, 0372273990, 0553780078, 0771936070 телефондоруна байланышууну өтүнүштү.