Сүйүнчү! Айсулуу Тыныбекова Дүйнө Кубогун жеңип алды

Кыргызстандык балбан кыз Айсулуу Тыныбекова Сербияда өтүп жаткан эркин күрөш боюнча Дүйнөлүк Кубоктун жеңүүчүсү болду.

Ал 62 килограммга чейинки салмак ченинде күч сынашып жаткан.

Тыныбекова 1/8 финалда Румыниянын спортчусун 10:0 эсебинде эрте жеңип, чейрек финалда түркиялык Жансу Аксойду да ушул эле эсеп менен жеңип алган.

Финалга чыгуу үчүн болгон беттеште Тыныбекова 2019-жылдын вице-дүйнө чемпиону, орусиялык Любовь Овчаровага каршы күрөшкөн. Кыргызстандык балбан кыз эч кандай кыйынчылыксыз эле орусиялык балбан кызды 13:2 эсеби менен эрте жеңип, финалга чыккан.

Финалда Тыныбекованын атаандашы латвиялык Анастасия Григорьева болду. Алгачкы секундалардан баштап, кыргызстандык балбан кыз өзүн көрсөтүп, ишенимдүү күрөштү.

Беттешти биринчи мезгилде эле Тыныбекова 14:0 эсеби менен эрте жеңишке жетип, мелдештин алтын медалын жеңип алды.