Мугалимди укпай, сабак учурунда түз эфирге чыккан окуучу окуган мектепке министр барды

Билим берүү жана илим министри Каныбек Иманалиев соцтармакта сабак учурунда түз эфирге чыгып мугалимге туура эмес мамиле кылган окуучу окуган мектепке барды. Бул тууралуу билим берүү жана илим министрлигинин маалымат кызматына шилтеме берип “Барометр” билдирет. 

Маалым болгондой, министр менен биргеликте Бишкек шаарынын вице-мэри Виктория Мозгачева жана Бишкек шаардык билим берүү башкармалыгынын жетекчиси Айнура Арстанбекова Бишкек шаарындагы №91 жалпы билим берүүчү мектеп-гимназияга барышты.

Аталган мектептин окуучусу сабак учурунда түз эфирге чыгып, мугалимге туура эмес мамиле кылган видеосу социалдык тармактарга тараган. 

“Министр окуучу бала жана мугалим менен жолугушуп, баланы ар дайым мугалимди сыйлоого чакырды. Окуучу түз эфирде кылган жосунсуз жоругу үчүн эжейинен жана жалпы мугалимдерден кечирим сурап, экинчи кайталабоого сөз берди.  

Каныбек Иманалиев жетекчиликке балдар жана ата-энелер үчүн психологдор менен жолугушуу уюштурууну, класстык тарбиялык сааттарды өтүүнү тапшырды”, -деп айтылат маалыматта..

“Эгерде сен Акжол Махмудовдой чемпион болом десең мен сага жардам берем. Айсулуу Тыныбекованы, Акжол Махмудовду дагы эжей-агайлар окуткан. Мен агай-эжелерди сыйлап жүрүп, министр болдум. Мен мугалимди сыйлагандардын баары менен дос болом. Биз мугалимди коргой албасак, чек араны кантип коргойбуз?”, - деди министр. 

Каныбек Иманалиев мамлекеттик саясат дагы мугалимдерди колдоого багытталганын белгилеп, Президент билим берүү тармагын өнүктүрүүгө өзгөчө көңүл буруп жатканын айтты.  

Ошондой эле министр кайсы окуучу жакшы эжей, мектеп, билимдин баркы жөнүндө ролик жасаса, окуучуларга атайын сыйлык бере тургандыгын кошумчалады.