Колдоп туралы! Бүгүн Айсулуу Тыныбекова Дүйнө Кубогунда беттешке чыгат

Сербияда өтүп жаткан күрөш боюнча Дүйнөлүк Кубоктун үчүнчү атаандашуу күнүндө грек-рим күрөшү боюнча дагы 5 медалдар топтому ойнотулат.

13-декабрда өткөн алдын-ала беттештердин жыйынтыгында Жоламан Шаршенбеков финалга чыгып, Калы Сулайманов коло медаль үчүн күрөшөт. Узур Джузупбеков чейрек финалда утулуп, бирок 3-орун үчүн жубатуучу турнирге мушташууга укук алды.

Ошондой эле, 14-декабрда аялдар арасында эркин күрөш боюнча мелдеш башталат. 62 килограммга чейинки салмак ченинде учурдагы дүйнө чемпиону Айсулуу Тыныбекова килемге чыгат.

Аялдар арасында алдын-ала раунддун беттештеринин башталышы Бишкек убактысы боюнча 16:00.

62 килограммга чейинки салмак ченинде Айсулуу Тыныбекова румыниялык Крисца Тунде Инкзе менен кармашат.

Эскерте кетсек, Тынбекова 2019-жылы Казакстанда өткөн дүйнө чемпионатында алтын байге утуп, дүйнө чемпиону болгон.

Белгилей кетсек, жакында эле Бириккен Күрөш дүйнөсү уюштурган онлайн чемпионатта кыз-келиндер күрөшүнүн тарыхында Айсулуу Тыныбекова эң мыкты балбан деп табылган. Онлайн таймашка дүйнөнүн мыкты делген 16 балбан кызы катышкан.