Казак ырчысы Димаш Кудайберген чыгармачылыгын эми АКШда улантат

Казак ырчысы Димаш Кудайберген карьерасын өркүндөтүү үчүн АКШга убактылуу көчүп кетүүнү пландап жатат. Бул тууралуу Tengrinews.kz. сайты жазган маалыматка шилтеме берип “Барометр” билдирет.

Мындай билдирүүнү ырчы америкалык MTV каналынын алып баруучусу Кеван Кенниге берген маегинде билдирди.
"Мен Америкада бир аз убакыт жашап турууну пландап жатам, анткени менин чыгармачылыгымды мындан ары да өркүндөтүп, дүйнөгө таанылуу үчүн ошондой чоң атмосферанын ортосунда болуш керек. Менде ушундай окуя болгон, мен үч жарым жыл Кытайда жашап ал жакта өз чыгармачылыгымды жайылтып, атымды таанытканмын. Бирок, менин сүйүктүү жерим ар дайым менин үй-бүлөм турган жерде", - деди Димаш Кудайберген.

Ошондой эле ырчы америкалык журналист менен болгон интервьюсун Instagram баракчасына жарыялады. Димаш Кудайбергендин күйөрмандары казак ырчысынын АКШда чыгармачылыгын улантуу идеясын колдогон комментарийлерди калтырып жатышат.