Элдик Банк жана Азиямоторс: ислам каржылоосу алкагындагы кызматташтык

«Элдик Банк» ААК жана «Азиямоторс» ЖЧК автоунааларды жана атайын техниканы ислам принциптерине ылайык сатып алуу үчүн жеткиликтүү каржылык инструменттерди өнүктүрүүгө багытталган стратегиялык кызматташтык боюнча келишимге кол коюшту.

Биргелешкен долбоордун алкагында кардарларга жеке жана коммерциялык пайдалануу үчүн транспорт каражаттарын ислам каржылоо принциптерине ылайык «Мурабаха Авто» жана «Иджара МБ-Бизнес» продукттары аркылуу бөлүп төлөө (рассрочка) менен сатып алуу мүмкүнчүлүгү сунушталат. Бул продукттарга ылайык, банк кардардын кайрылуусу боюнча транспорт каражаттарын сатып алып, андан кийин аларды «Мурабаха Авто» боюнча сатуу же «Иджара МБ-Бизнес» боюнча ижарага берүү (иджара) мүмкүнчүлүгүн камсыздайт — бул Шариаттын талаптарына ылайык ишке ашырылат.

«Элдик Банк» менен «Азиямоторс» ортосундагы кызматташтык калк жана бизнес үчүн заманбап, ачык жана этикалык каржылык чечимдерге жеткиликтүүлүктү кеңейтүүгө, ошондой эле өлкөнүн автотранспорт секторунун өнүгүшүн колдоого өбөлгө түзөт.

Эки тараптын өкүлдөрү келишимге кол коюу — өнөктөштүк мамилелерди чыңдоодо жана Кыргызстанда ислам каржылоосун өнүктүрүүдө маанилүү кадам болорун белгилешти.