Депутат: "Иштеп жаткан пенсионерлер айлык алсын же пенсия алсын"

Ишке жарамдуу пенсинонерлер же айлык алсын, болбосо пенсия менен эле чектелсин. Мындай оюн Жогорку Кеңештин депутаты Таабалды Тиллаев 15-ноябрда парламентте билдирди. 

Депутаттын айтымында, пенсионерлер үчүн казынадан жылына 50 млрд сом төлөнөт. 

"Бюджеттен айлык алып жаткандан кийин, пенсия берүүнү иштеп жаткан пенсионерлерге токтотуу керек. 40 миң адам өтө көп"-деди депутат. 

Социалдык фонддун төрагасы Медер Ирсалиевдин берген маалыматына караганда, өлкөдө 648 миң пенсионер бар, алардын 40 миңи мамлекеттик кызматтарда иштешет. Ал эми премьер-министр Кыргызстанда 65 жашка чейин иштей берсе боло тургандыгын, мыйзам жол берерин айтты.