Бишкекте түндө кишини көкүрөк тушка бычак менен сайган шектүү кармалды

12-мартта түнкү саат 00:40тар чамасында “102” кызматына билдирүү келип, Байтик баатыр көчөсүндөгү дүкөндөрдүн биринен жанында белгисиз киши эс-учун жоготуп жатканы кабарланган. Бул тууралуу Октябрь РИИБдин маалымат кызматы билдирди.

Окуя болгон жерге келген Октябрь РИИБдин ыкчам тобу эс-учун жоготуп жаткан киши 1979-жылы туулган А.Э. экенин аныктап, көкүрөк тушка бычак жегенин тастыктаган. Жабыркаган жаран Тез жардам кызматы менен Мамакеев атындагы Улуттук хирургиялык борборуна жеткирилген.

Ыкчам тергөө иш-чараларынын жүрүшүндө кылмышка шектүү катары 1979-жылы туулган Г.М. кармалып, тергөө учурунда өз ыктыяры менен кылмыш жасаган буюмун — бычакты өткөрүп берген.

Учурда кармалган жаран убактылуу кармоо жайына киргизилип, тийиштүү экспертизалар дайындалды. Анын жыйынтыгы менен юридикалык баа берилет.