“Бакубат Талас” фонду апрель окуясынын баатырларын эскерүүгө 500 миң сом бөлгөн

Талас шаарында апрель окуяларынын 11 жылдыгы эскерилди. Бул тууралуу “Бакубат Талас” фондунун маалымат кызматына шилтеме берип "Барометр" билдирет. 

Маалым болгондой, 6-апрель күнү Талас шаарында 6-7 апрель Элдик революция күнүнүн 11 жылдыгына карата иш-чаралар өткөрүлгөн.

"Эскерүү кечесине Кыргыз Республикасынын өкмөтүнүн Талас облусундагы ыйгарым укуктуу өкүлү Бакытбек Нарбеков, Талас облусунун райондорунун акимдери, Элдик революциянын баатырлары, курман болгон баатырлардын туугандары катышты.

Иш-чараларды өткөрүүгө “Бакубат Талас” фондунан 500 000 сом бөлүндү.

Иш-чара Элдик революциянын баатырларынын эстелигине гүл коюу менен башталып, Талас облустук музыкалык драма театрында апрель революциясында курман болгон баатырлардын балдарынын эркиндигин, турмушун, келечегин чагылдырган спектакль менен уланды. Иш-чара келген конокторго тамак тартуулоо жана революция курмандарына куран окуу менен аяктады", - деп айтылат маалыматта. 

Эске сала кетсек, 2010-жылдын 7-апрелинде Кыргызстанда бийлик алмашып, Курманбек Бакиев башында турган бийлик көтөрүлүш жолу менен кетирилген. Анын алдында аянттагы нааразылык акциясына чыккан элге ок атылып, ошол күнү кеминде 87 кишинин өмүрү кыйылган.

2010-жылдын 6-апрелинде элдик толкундоолор алгач Нарын шаарында башталып, кийин Таласта уланган. 7-апрель Бишкекте кан төгүлүү менен коштолгон элдик революция күнү деп тарыхта калды.