«Альянс Алтын»Кыргызстандын ак ниет ишкерлеринин реестрине кирди

Кыргызстанда ак ниет ишкерлердин реестри түзүлдү. Анын курамына сегиз компания кирген. Алардын тизмесин Экономика жана соода министрлиги жарыялады.

Жарыяланган тизменин арасында  «Альянс Алтын» ишканасы да бар. Ошону менен катары эле,  «Алайку Органикс» ЖЧКсы, «Кул Брос» ЖЧКсы, «Айко-Сейко» ЖЧКсы, «Аджи Сервис» ЖЧКсы, «Кока-Кола Бишкек Боттлерс» ЖАКсы, «Бай Дыйкан» ЖЧКсы жана «Демир Кыргыз Интернэшнл Банк» ЖАК бар.

Реестрге кирген компаниялар үчүн бир катар артыкчылыктар берилери айтылган. 

Алар мамлекеттик телеканалдардан жарнамалоо үчүн бекер эфир убактысын, артыкчылыктуу салык жана бажы кызматтарын алышат. Ошону менен катары эле, Кыргызстандын атынан эл аралык көргөзмөлөргө, жарманкелерге, форумдарга акысыз катышышат.

Мындан тышкары, реестрден ишканалар салык мыйзамдарына ылайык жүргүзүлгөн текшерүүлөрдү кошпогондо, мамлекеттик көзөмөлдөөчү органдардын текшерүүлөрүнөн үч жылга бошотулат жана мамлекеттик кредиттөө программаларын ишке ашыруунун алкагында жеңилдетилген каржылоону алышат.