АКШда атасы унутуп кеткен балдар унаада каза болушту

АКШнын Оклахома штатынын Талса шаарында атасы уктаганы кетип унаасында унутуп калган эки жаш баласы каза болду. Бул тууралуу Fox23 агенттиги укук коргоо органдарына шилтеме берип билдирди.

31 жаштагы Дастин Ли Деннис ишемби күнү балдары менен дүкөнгө барып келип, үйүнө келген соң уктаганы жаткан. Беш саат уктап тургандан кийин балдарын таппай издеп баштаган. Кийин унаасына барып эс учун жоготкон 4 жаштагы кызын жана 3 жаштагы уулун тапкан. Тез жардам чакырганы менен кеч болуп калган. Учурда өлүмгө эмне себепкер болгону такталууда.

Жергиликтүү метеорологдордун маалыматы боюнча, окуя болгон күнү абанын температурасы 30 градус ыссыктан ашкан.

Учурда кылмыш иши козголуп, балдардын атасы убактылуу кармоочу жайга киргизилди.