Айсулуу Тыныбекова жарым финалга өттү. Эми кийинки турга добуш бериңиздер

Эркин күрөш боюнча кыз-келиндер арасында дүйнө чемпиону Айсулуу Тыныбекова аны колдоп, добуш берген мекендештерине ыраазычылыгын билдирди. Бул тууралуу анын фейсбук баракчасына жазылган маалыматка шилтеме берип “Барометр” билдирет.

Маалым болгондой, Кыргызстандык балбан кыз Бириккен күрөш дүйнөсү (United World Wrestling) уюштурган онлайн чемпионатта 1/2 финалга өттү. UWW инстаграмм баракчасы аркылуу дүйнөнүн мыкты балбан кызын аныктоо максатында виртуалдуу чемпионат өткөрүп жатат.

Кыргызстандын атынан ат салышып жаткан балбан кыз Тыныбекова дүйнөнүн бир нече жолку чемпиондору менен таймашып жатат. Учурда балбан кыз күйөрмандарынын колдоосу менен алдыда келе жатат.

“Урматтуу Кыргызстандыктар!

Учурда инстаграмм социалдык тармагындагы UWW баракчасында болуп жаткан мелдеште мени колдогонуңуздар үчүн терең ыраазычылык билдирем. Виртуалдуу түрдө болсо да мен үчүн эң сонун сезим тартуулап жатат. Мен үчүн жан тартып, дем-күч берген күйөрмандарыма рахмат!”- деп жазды Тыныбекова.

Эскерте кетсек, Мелдештин шарты боюнча 16 балбан ат салышып,  алар эки топко бөлүнүштү. Кыз-келиндер арасындагы эркин күрөштүн жылдыздары, Айсулуу Тыныбекова баш болгон сегиз кыз схеманын бир тарабында ат салышат. Ал эми, кыз-келиндер арасындагы эркин күрөштүн легендалары дагы сегиз адам экинчи тарабында таймашат.

Баса белгилей кетсек, онлайн таймаш ушуну менен токтоп калбайт, кайрадан кийинки турга добуш берүү улантылат. Кыргыздын сыймыгы, балбан кызыбызды колдоп, ар бир Кыргызстандыкты добуш берүүгө чакырабыз. Ал үчүн болгону, төмөндө көрсөтүлгөн атайын шилтеме аркылуу инстаграммдын сторис бөлүмүнө кирип, добуш берүүгө болот.

https://www.instagram.com/unitedworldwrestling/