Айсулуу Тыныбекова: Мен үчүн бул күтүүсүз болду!

Токиодо өткөн Олимпиада оюндарынын күмүш медалынын ээси Айсулуу Тыныбекова социалдык баракчасына  ыраазычылыгын билдирген пост бөлүшкөнүн “Барометр” маалымдайт.

“Урматтуу достор! Бүгүн эмгегибиз дагы бир ирээт бааланып, машыктыруучуларыбыз жана ата-энелерибиз менен сүйүнүп отурабыз! Мага II даражадагы «Манас» ордени ыйгарылды. Бул мен үчүн өтө чоң жоопкерчилик!

Мындан сырткары, 10 млн сомдук сертификатка ээ болдук.

«Toyota RAV4» үлгүсүндөгү авто унаанын ачкычы да тапшырылды. Президентибиз Садыр Жапаров бул белекти жеке өзүнүн атынан ыйгарды. Мен үчүн бул күтүүсүз болду! Терең ыраазычылык айтам, Садыр Нургожоевич!”,-деп жазды Айсулуу Тыныбекова.

Эскерте кетсек, бүгүн 23-августта президент Садыр Жапаров  Олимпиада оюндарынын жеңүүчүлөрүнө мамлекеттик сыйлыктарды  тапшырды.