Социалдык камсыздандыруу, Соцфонд жана ишкердик субъектилерин текшерүүнү тартиби тууралуу мыйзамга өзгөртүү кирди

Президент Сооронбай Жээнбеков «Мамлекеттик социалдык камсыздандыруу боюнча камсыздандыруу салымдарын жыйноону башкаруу маселелери боюнча айрым мыйзам актыларына өзгөртүүлөрдү киргизүү жөнүндө» мыйзамга кол койду. Бул тууралуу Президенттин Басма сөз кызматы билдирди. 

Мыйзам Кыргыз Республикасынын Жогорку Кеңеши тарабынан 2020-жылдын 15-апрелинде кабыл алынган.

Аталган мыйзамдын максаты — мамлекеттик социалдык камсыздандырууда камсыздандыруу салымдарын жыйноону башкаруу боюнча иш- милдеттерди Кыргыз Республикасынын Өкмөтүнө караштуу Мамлекеттик салык кызматынын карамагына өткөрүп берүүнү мыйзамдык жактан камсыз кылуу болуп эсептелет.

Кабыл алынган мыйзам менен «Мамлекеттик социалдык камсыздандыруу жөнүндө», «Кыргыз Республикасынын Социалдык фонду жөнүндө», «Ишкердиктин субъекттерине текшерүүлөрдү жүргүзүүнүн тартиби жөнүндө», «Жергиликтүү өз алдынча башкаруу органдарынын ишин текшерүүлөрдү жүргүзүүнүн тартиби жөнүндө» мыйзамдарга, Кыргыз Республикасынын Салык кодексине, Кыргыз Республикасынын Бюджеттик кодексине айрым өзгөртүүлөр жана толуктоолор киргизилди.

Мыйзам расмий жарыяланган күндөн тартып он беш күн өткөндөн кийин күчүнө кирет.