Кашкар Жунушалиев Борут Эржен менен жолукту. Борбордук Азиядагы чек аралар тууралуу эмне талкууланды?

Стамбул шаарында өтүп жаткан Будапешт процессинин Алтынчы министрлер конференциясынын алкагында   КРнын Ички иштер министри Миграциялык саясатты өнүктүрүү эл аралык борборунун  Чек ара жана виза иштери маселелери боюнча Программалык менеджери Борут Эржен менен жолукту. Бул тууралуу ИИМ билдирди. 

Жолугушуунун жүрүшүндө  Борут Эржен 2004-жылдан бери Борбор Азиядагы чек араларды башкаруу программасынын алкагында ишмердүүлүгүн жүргүзүп жатышкан Кыргызстандагы өзүнүн уюмунун ишмердүүлүгү жөнүндө тааныштырды. Кыргызстан уюм тарабынан  өткөрүлүп келген баардык иш-чараларга активдүү катышып жаткандыгын белгилеп, Борбор Азиядагы чек араларды башкаруу программасынын көптөгөн долбоорлору адамдарды сатуу, адамдарды чек ара аркылуу мыйзамсыз өткөрүү,  баңгизаттарды аткезчилик жол менен ташуу сыяктуу эл аралык кылмыштар менен күрөшүү көйгөйлөрүнүн үстүндө иш алып барышаарын айтты. Бул багытта Кыргыз Республикасынын Ички иштер министрлиги менен  кызматташтууну бекемдөөгө кызыкдар экендигин билдирди.

Министр Кашкар Жунушалиев, Миграциялык саясатты өнүктүрүү эл аралык борборуна Борбор Азия аймагында улуттар аралык кылмыштуулук менен күрөшүүнү колдогондоруна ыраазычылыгын билдирди.  Ал өз тарабынан  жалпы кызыкчылыктарды эске алып,  Миграциялык саясатты өнүктүрүү эл аралык борбору менен кызматташууну өнүктүрүү боюнча кийинки кадамдарды кароого Кыргыз Республикасынын ИИМи даяр экиндигин айтты.