Караколдо күйөөсү аялына бензин чачып өрттөп жиберди

Ысык-Көл облустук милициясынын маалымат кызматынын жетекчиси Сталбек Усубакунов ушундай окуя болгонун ырастап, ал 4-январда болгонун билдирди.

Ага ылайык, 4-январда саат 16:20лар чамасында Каракол шаардык милиция бөлүмүнө Торгоев көчөсүндө жайгашкан кафелердин биринин жанынан эркек киши аялга бензин чачып, өрттөп жибергени боюнча маалымат келген.

Окуя болгон жерге шаардык милициянын ыкчам-иликтөө тобу келген.

Иликтөөнүн алдын ала маалыматы боюнча Жети-Өгүз районунун Богатыровка айылынын 33 жаштагы тургунун (аял киши) анын жарандык никеде жашаган 35 жаштагы күйөөсү (Ак-Суу районунун Маман айылынын тургуну) чырдан кийин бензин чачып өрттөп салган. Окуядан кийин ал изин жашырып кеткен.

Денеси күйгөн аял Ысык-Көл облустук биргелешкен ооруканасына жеткирилген.

Учурда тийиштүү бардык экспертизалар дайындалды.

Ыкчам тергөө аракеттери маалында шектүү киши кармалып, Каракол шаардык сотунун чечими менен эки айга камакка алынды.

Тергөө амалдары жүрүп жатат.