ИИМ: Балыкчыдан жерге көмүлгөн бир сумка толо курал-жарак жана баңги зат табылды

ИИМдин Экстремизм жана мыйзамсыз миграцияга каршы аракеттенүү боюнча кызматынын кызматкерлери мыйзамсыз сакталган курал-жарактарды, ок-дарыларды аныкташты. Бул тууралуу ИИМдин маалымат кызматына шилтеме берип "Барометр" билдирет.

2020-жылдын 25-октябрында Кыргыз Республикасынын ИИМдин Экстремизм жана мыйзамсыз миграцияга каршы аракеттенүү боюнча кызматына ыкчам маалымат түшүп, 2020-жылдын март айында Ысык-Көл облусунун Балыкчы шаарынын түштүк тарабында жайгашкан дамба жер тилкеси жагында 2 бейтааныш адам, жашыруун түрдө белгисиз буюмдарды көмүп жаткандыгы маалым болгон.

Алынган маалымат Кыргыз Республикасынын Жазык кодексинин  253- беренеси (Куралдарды, ок-дарыларды мыйзамсыз жүгүртүү) боюнча Ысык-Көл облусунун Балыкчы ШИИБнин КЖБРне катталып, сотко чейинки өндүрүш иши башталган.

Сотко чейинки өндүрүш ишинин алкагында тергөө тапшырмасы алынып, Кыргыз Республикасынын Экстремизм жана мыйзамсыз миграцияга каршы аракеттенүү боюнча кызматынын кызматкерлери тарабынан ыкчам–издөө иш-чаралары жүргүзүлүп, 2020-жылдын 7-ноябрында Балыкчы ШИИБнин кызматкерлери жана ыкчам-тергөө тобу менен биргеликте жеринде издөө иштери жүргүзүлгөн.

Жыйынтыгында Балыкчы шаарынын Тоголок Молдо жана Арчалы көчөлөрүнүн кесилишиндеги дамбанын түндүк тарабы жакта таштарга көмүлгөн көгүш түстөгү  спорттук сумка табылып, анын ичинде:

- 1 даана номуру жок, АКСУ-5,45 мм үлгүсүндөгү сайлуу, бир даана магазини менен ок атуучу куралы, 30 даана огу;

- аскердик жардыруучу граната, кольцосу менен;

- 2 кара түстөгү бет кап;

- кара түстөгү 2 жуп кол кап;

- 1 даана скотч;

- 1 даана колго жасалган, кармагычы жыгач бычак;

- 1 даана 8, 5 метр болгон, аркан;

- 1 даана ак түстөгү целофанга оролгон өзгөчө жапайы кендир жыты бар күрөң жашыл түстөгү, майдаланган салмагы 70 грамды түзгөн заты (канабис);

- 3 даана ичи бош, сыртында медициналык этил спирти деп жазылган бөтөлкөлөрү болгон.

Жогоруда көрсөтүлгөн буюмдар далил зат катары алынган.

Аталган факт боюнча соттук-химиялык, соттук-балистикалык, соттук-дактилоскопиялык, соттук-криминалисттик экспертизалар дайындалган.

Учурда жогорудагы кылмыш иштерине тиешеси бар адамдардын өздүгүн тактоо жана кармоо боюнча ыкчам иликтөө иш-чаралары, тергөө амалдары жүрүп жатканы маалым болду.