Ички иштер министри жаңы медициналык борбордун жана милициянын жаңы имаратынын ачылышына катышты

Ички иштер министри Кашкар Жунушалиев  Жала-Абадка болгон бүгүнкү 17-декабрдагы  иш сапарында  жаңы медициналык-стационардык борбордун ачылышына жана Барпы айылындагы милициянын жаңы имаратынын ачылышына катышты. Бул тууралуу жогоруда аталган мекеменин басма сөз кызматы билдирди. 

“Аталган борбор милиция кызматкерлерине, ички иштер органдарынын ардагерлерине медициналык жардам көрсөтөт. Жалал-Абад облусу боюнча жалпысынан 700 ички иштер органдарынын ардагерлери бар. Ички иштер органдарынын ардагерлери менен кызматкерлерине жер-жерлерде медициналык жардам көрсөтүлөт”-деди министр өз сөзүндө. 

Жогорудагыдай стационардык медициналык борбор-түштүк аймакта биринчи жолу ачылып жаткан ИИМдин тутумундагы реабилитациондук мекеме болуп саналат. Ал 10 орундуу болуп, негизги тапшырмаларынын бирине өзгөчө кырдаалдарда ыкчам-кызматтык тапшырмаларды аткарышкан ички иштер органдарынын кызматкерлерин дарылоо кирет.

Эске салсак,  ушул жылдын май айында Кашкар Жунушалиев республиканын түштүк аймагына болгон иш-сапарында ардагерлер борборго келип дарыланууга мүмкүнчүлүк болбой жаткандыгын айтышып, Жалал-Абад облусу боюнча жаңы медициналык-стационардык борбор ачып берүүлөрүн суранышкан.