Ички иштер министри Терек-Сайдагы камалган тургундардын туугандары менен жолукту

Ички иштер министри Кашкар Джунушалиев бүгүн 17-декабрда иш сапары менен өлкөнүн түштүк аймагына барып Терек-Сай айылынын кармалган жашоочуларынын туугандары менен жолукту. Бул тууралуу ИИМдин басма сөз кызматы билдирди. 

Жолугушууга облустук ички иштер башкармалыгынын башчысы Кылычбек Жолдошов, Чаткал районунун акими Канжарбек Эшалиев жана Терек-Сай айылынын өкмөтүнүн башчысы, кармалгандардын туугандары катышышты.

Жолугушуунун жүрүшүндө айыл өкмөтүнүн башчысы менен кармалгандардын туугандары кармалгандарга карата баш коргоо чарасын өзгөртүп берүүлөрүн суранышып, кармалгандар жаштыгы жана мыйзамды билбегендеринин айынан мыйзамды бузандарын белгилешти. Андан сырткары, кармалгандардын арасында мурда инвесторлорду колдоп,  ишкерлик менен алектенишип, жергиликтүү 

тургундарга жумуш орундарын түзгөндөр дагы бар экендигин билдиришти-деп жазылат маалыматта. 

Жолугушуунун жүрүшүндө министр кармалгандардын туугандарынын кайрылууларын угуп, бардыгы мыйзамдын негизинде чечилерин айткан. 

Эске салсак,  2018-жылдын 5-ноябрында Чаткал районунун Терек-Сай айылынын “Эти Бакыр Терек-Сай” алтын кен иштетүүчү аймакта кызматын өтөө учурунда Чаткал районунун Терек-сай айылынын 15 жергиликтүү тургуну милиция кызматкерлерине карата күч колдонушкан. Ошол учурда өздөрүнүн кызматтык милдеттерин аткарып жатышкан ички иштер органдарынын кызматкерлери денелеринен ар кандай жаракаттарды алышкан. Бул окуяга байланыштуу кылмыш иши козголуп, бардык 15 жарандын өздүгү такталып, козголгон кылмыш ишинин алкагында кармалышкан.  2018-жылдын 4-декабрь күнү Терек-сай айлынын 15 тургунуна карата сот тарабынан тергөө абагына 6 жаранга 2 айга, 9 жаранга 1 айга камакка алуу чечими чыккан.