Ички иштер министри эл аралык чемпионаттарда жеңген милиция кызматкерлерин сыйлады

Ички иштер министри ар кандай эл аралык деңгээлдеги чемпионаттарда жеңген спортчу милиция кызматкерлерине сыйлыктарды тапшырды . Бул тууралуу ИИМдин Басма сөз кызматы билдирди. Кыргыз Республикасынын ички иштер министри Кашкар Джунушалиев ИИМдин "Шумкар" АБПнын кызматкерлерин спортто жана кызматтык ишмердүүлүгүндө жетишкен ийгиликтери үчүн кабыл алып, сыйлады. 2019-жылдын 27-декабрь күнү ички иштер министрлигинде эл аралык спорттук мелдештерде жеңгендерди жана ардактуу орундарга ээ болгондорду  куттуктоо иш-чарасы болду. Биздин спортчу милиционерлер улуттук курам менен эл аралык деңгээлдеги спорттук мелдештерде катышып, алдыңкы орундарды багындырышууда. Ички иштер министри ИИМдин "Шумкар" АБПнын кызматкерлерин кабыл алып, кызматы үчүн ыраазычылык билдирип, түзүмдүк сыйлыктарды тапшырды. ИИМ башчысы аларга бекем ден соолук, ийгилик, жогорку спорттук жетишкендиктерди каалады.  Сыйлангандардын ичиндеги милициянын старшинасы Эргеш уулу Медетбек Кыргызстандын волейбол боюнча курама командасынын мүчөсү. Эске салабыз, Кыргызстандын курама командасы 2019-жылдын август айында Непалдын борбору Катманду шаарында өткөн волейбол боюнча Азия чемпионатында жеңүүчү болгон. Ал эми, милициянын ага лейтенанты Аширов Орозбек Казакстанда өткөн    алыш боюнча дүйнө чемпионатында биринчи орунду алган. Ага 27 өлкөдөн 270 спортчу катышкан. Милициянын ага сержанты Идирисов Бектур Индияда өткөн чемпионатта самбо боюнча Азия чемпиону болгон. Андан сырткары бул кызматкер Казакстанда өткөн самбо боюнча эл аралык турнирде экинчи орунду алган. Милициянын старшинасы Туратов Динисбек Казакстанда өткөн кол күрөш боюнча эл аралык турнирдин жеңүүчүсү. Кыргызстандын ички иштер органдарында эл аралык аренада кыргыз спортун даңктаган профессионалдуу спортчулар арбын экендигин баса белгилейбиз.

ИИМдин Басма сөз кызматы