Узатып, тосуп алуучулар аэробекетке кире алышпайт

 Ички авиа каттамдардын жандануусу менен аэробекеттин тартиптери убактылуу өзгөрдү. Бул тууралуу Республикалык штаб билдирди. 

Маалыматка ылайык, коронавирус инфекциясын жайылып кетпөөсүн алдын алуу максатында, «Манас», «Ош» жана «Ысык-Көл» эл аралык аэропортторунун аэробекет комплекстеринин имаратындагы тартиптер өзгөрдү.

Эл аралык аэропорттордун аэробекеттерине көрсөтүлгөн күнгө карата билеттери бар авиажүргүнчүлөр, жашы жете элек балдар жана ден соолугунан мүмкүнчүлүгү чектелген адамдарды коштоп жүргөндөр гана кире алышат. Ал эми узатып жана тосуп жаткан адамдар үчүн кирүүгө убактылуу чектөө киргизилди.

Коронавирус илдетин алдын алуу максатында аэробекеттерге кирүүдө бардык жүргүнчүлөр жана жол жүктөрү дезинфекциялоочу туннель аркылуу өтүп, термометрикалык көзөмөлдөн өтүшөт.