Депутат: “Өзбекстандын продукциялары биздин дыйкандарды, ишкерлерди банкрот кылууда”

“Өзбекстандын продукциялары биздин дыйкандарды, ишкерлерди банкрот кылууда” деди депутат Айтмамат Назаров бүгүн, 20-сентябрда Жогорку Кеңештин жыйынында. Эл өкүлү коңшу мамлекеттер менен алака жакшырып, карым-катыш, алыш-бериш жолго коюлганы менен, мунун терс таасири айыл чарба ишкерлерине, дыйкандарга тийип жаткандыгын айтты.

“Өзбекстанда аба ырайы эрте жылып, Кыргызстандын дыйкандары өстүргөн өнүмдөрү бышканча алардын продукциялары республика аймагына эрте кирип, андан тышкары, ЕАЭБ аймагына чейин эртелеп сатылып кетүүдө. Мындан улам, биздин дыйкандар, айрыкча, күнөскана иштеткендер банкроттук абалга жетти. Өзбекстандан колго алынуучу жүк деген макам менен товарлар кирет. Бирок ошол колго алынуучу жүк деген макам менен канча товарлар бажы төлөмү төлөнбөй кирүүдө. Текстиль тармагы болсо “Дордойду” басып кетти”,- дейт Назаров.