Пол Манафорт орусиялык адвокат менен жолуккандыгы боюнча көрсөтмө берди

АКШ президенти Дональд Трамптын шайлоо штабынын мурдагы башчысы Пол Манафорт Сенаттын чалгындоо комитетинде көрсөтмө берди. Бул тууралуу Борбор Азия жаңылыктар кызматы "Associated Press" агенттигине шилтеме берип  билдирди

Басылманын маалыматы боюнча, Манафорттун көрсөтмөсү анын 2016-жылы орусиялык адвокат Наталья Весельницкая менен болгон жолугушуусуна гана байланыштуу болду. Манафорт сенаттын комитетине кошумча маек берүүгө макул болду.

 

Шейшембиде Сенаттын юридикалык комитети АКШдагы былтыркы шайлоо өнөктүгү маалындагы Орусиянын аракеттери боюнча угуулардын алкагында көрсөтмө берүүсү үчүн Манафортко чакыруу кагазын жөнөткөн. Комитеттеги угуулар шаршембиде өтөт.

 

Манафорт АКШдагы былтыркы шайлоого Орусиянын ыктымал кийлигишүүсү боюнча иликтөөдө башкы фигуралардын бири болуп эсептелет. 2016-жылы июнда Манафорт Трамптын шайлоо штабын жетектеп, анын уулу менен орусиялык юрист Наталья Весельницкаянын ортосундагы жолугушууга катышкан. Ошол эле жылы августтун ортосунда Манафорттун Украинанын экс-президенти Виктор Янукович менен ишкердик жана саясий байланыштары белгилүү болуп, ал кызматтан кеткен.