АКШнын кол башчысы Ооганстанга күтүүсүз барды

Американын башкы кол башчысы - штаб башчыларынын бирдиктүү комитетинин жетекчиси генерал Жозеф Данфорд күтүүсүз сапары менен Ооганстандын борбору Кабулга келди. Бул тууралуу Борбор Азия жаңылыктар кызматы кабарлады.

Бир нече күнгө созула турган бул визиттин алкагында Данфорд ооган расмийлери, АКШ баштаган эл аралык коалициянын лидерлери менен жолугат.

Эл аралык күчтөрдүн Ооганстандагы миссиясы 2014-жылы аяктаган. Бирок андан бери ооган күчтөрү коопсуздукту камсыз кылууда кыйынчылыкка кабылып келет. Мындан улам АКШ Ооганстанга кошумча 3-3,5 миң аскер жөнөтүүнү пландап жатканын америкалык басылмалар жазып чыгышты.

Учурда Ооганстанда 8 миңдей АКШ аскери бар. Алар көбүнчө ооган күчтөрүн машыктыруу жана аларга кеңеш берүү менен алек болушат.