ЕБ Чоң-Алайдагы жер титирөөдөн жабыркагандарга жардам берет

Европа комиссиясы табият кырсыгынан жапа чеккен үй-бүлөлөрдү колдоо үчүн 165 миң евро бөлөт. Каражат Чоң-Алай районунда жер титирөөдөн жабыр тарткан 2 750 жашоочуга багытталат.

ЕБнын Кыргызстандагы өкүлчүлүгүнүн билдиришинче, каражат өлкөдөгү Улуттук Кызыл жарым ай коомуна жөнөтүлөт. Уюм жеңил жууркан, идиш-аяк, жеке гигиена каражаттары сыяктуу жашоо үчүн эң керектүү буюмдарды бөлүштүрүп, таратып берүү милдетин алды.

Мындан тышкары жабыр таркан үй-бүлөлөргө акчалай жардам берилет.

3-майда кыргыз-тажик чегинде күчү 5,9 баллга жеткен жер титирөө катталган. Экинчи жолу 5 майда ушул эле аймакта 5,8 баллга жеткен жер силкинүү болгон. 500дөй үй талкаланып, 200дөйүнөн жараңка кеткен. Жалпысынан 5 миңдей жашоочу жардамга муктаж.