Манчестердеги жардыруудан 19 киши мерт кетти

Улуу Британиянын Манчестер шаарындагы жардырууда 19 киши мерт кетип, 50 чамалуу адам жараат алды. Жардыруу 22-майда, америкалык поп-жылдыз Ариана Гранденин концертинен кийин болду. Бул тууралуу Борбор Азия жаңылыктар кызматы кабарлады.

Жардыруунун себеби азырынча белгисиз. Бирок жергиликтүү бийликтин маалыматы боюнча, полиция муну терракт катары сыпаттоодо. BBC полицияга шилтеме кылып билдиргендей, жардыруу болгон жерден алыс эмес жайдан экинчи жардыргыч зат табылды.

Учурда жардыруу болгон жерде саперлор иштеп жатышат. Концерттик зал жана анын айланасындагы райондордо аскерий полиция күзөттө турат. Жакынкы темир жол станциялары жабылды.

Гранде ырдаган Manchester Arena Европадагы эң чоң концерттик зал. Жардыруу маалында 22 миң орунду зал элге жык толгон.