Дин ишмери Абдышүкүр Нарматовдун уулуна ок атышты

Аалымдар кеңешинин төрагасы Абдышүкүр Нарматовдун үйүнө кирген уурулар 21 жаштагы уулуна ок атып, жарадар кылды. Бул тууралуу Чүй облустук ички иштер башкармалыгынын басма сөз кызматы маалымдады.

Аталган маалыматка таянсак, 3-майдан 4-майга караган түнү таңга маал уурулар дин ишмеринин Аламүдүн районунун Көк-Жар айылындагы үйүнө келишип, короодо токтоп турган Тойота Камри унаасын талкалап, унаадан 8 миң сом акчасын жана документтерин уурдашкан.  

Каракчылар үйгө кирүүгө аракет кылып жаткан маалда үй ээлери ойгонуп кеткен. 1997-жылы туулган А.И. аттуу уулу  эки белгисиз адамды көрүп кармоого аракет кылган. Алардын бири 2-3 ирет тапанчадан ок чыгарып жигит жаракат алган. Учурда ал ооруканада, абалы жакшы.  

Бул факты боюнча Кылмыш-жаза кодексинин 164-беренеси (“уурулук”) жана 168-беренеси ("карактоо") беренеси боюнча кылмыш иши козголду.

Учурда шектүүлөрдү издөө жана тергөө иштери уланууда.