Төрага өкмөттөн Бишкек-Ош жолундагы унаа тыгынын жоюну талап кылды

Бүгүн, 30-декабрда, парламенттин жыйынында депутат Төрөбай Зулпукаров өкмөттү Төө-Ашуудагы жол тыгын маселесин чечүүгө чакырды.

"Бишкек-Ош автожолунда тыгын пайда болду, адамдар өтө албай Төө-Ашууда кармалып турушат. Өкмөт бул маселени чечиши керек»,-деди ал.

Парламенттин спикери Дастанбек Жумабеков, өкмөт мүчөлөрүнөн Бишкек-Ош жолундагы тыгын маселесин Жаңы жылга чейин чечүүнү талап кылды.

Эл өкүлдөрүнүн маалыматына ылайык, жол тыгындан улам айдоочулар 30 саат бою тыгында кармалууда.

Вице-премьер-министр Дайыр Кенекееев өз кезинде, ар бир депутатка жаңырган жыл бакыт алып келишин каалады.  

Эске салсак, 29-декабрда саат 16:20да "Сосновка" постунда (Жайыл району, Чүй областы), Бишкек-Ош жолунда тайгактан улам пайда болгон тыгынга байланыштуу бардык автотранспорт каражаттары үчүн чектөө киргизилген.

Унаалар топтолгон тыгын жерлерде Жол коопсуздугун камсыздоо боюнча башкы башкармалыгынын кызматкерлери иштеп жатат жана инженердик техникалар тартылды.