Бишкекте таксист коронавирусту өзүнүн үй-бүлөсүнүн алты мүчөсүнө жуктурган

7-апрелге карата Бишкек шаарында коронавирус менен 25 адам ооруганы аныкталды. Бул тууралуу калаа башчысы Азиз Суракматов билдирди.

Ал 25 адам жакын туугандары болгон 66 адам менен жана бирге иштеген, дос-тааныштары болгон 204 адам менен байланышканын кошумчалады.

Мэр коронавирусту жуктурган эки учурду мисал катары келтирди.

Биринчи учур – таксист болуп иштеген жаран коронавирусун жуктуруп, өзүнүн ооруп жатканын билбестен үй-бүлөсүнүн 6 мүчөсүн – жубайын, кызын, күйөө баласын, эки уулун жана небересин – кошо ооруткан.

Экинчи учур – башка үй-бүлөдө бир жаран 4 жакын тууганына ооруну жуктурган.

Акыркы маалымат боюнча Кыргызстанда 228 кишиге коронавирус жуккан.