Биринчи лигада кѳкбѳрү оюнунан "Бакубат Талас" жеңишке жетти

Эгемендик күнүнө арналган көкбөрү боюнча Кыргызстандын президентинин кубогунун биринчи лигасында Талас облусунун "Бакубат Талас" командасы жеңүүчү болду.

Бүгүн, 31-августта Чолпон-Ата шаарындагы ат майданда болуп өткөн финалдык таймашта "Бакубат" Чүйдүн "Ак-Суу" командасын 9:0 эсебинде жеңип алды.

Үстүбүздѳгү жылы "Бакубат Талас" командасы Жеңиш күнүнө арналган республикалык мелдеште жогорку лигада 6-орунду алып, биринчи лигага которулган. Бул жеңишинен кийин кайрадан жогорку лигага жолдомо алды.

Бул күнү жогорку лигада Оштун "Достук" командасы менен Таластын "Ынтымак" командасы беттешет. 

Оюн саат 15:00дө уланат.

Бүгүн көкбөрү оюнунан сырткары улуттук ат оюндары: салбуурун, эр эңиш жана ат чабыш боюнча мелдештер каралган.

Көкбөрү боюнча республикалык мелдеш 26-августта башталган. Байге үчүн жогорку лигада алты, биринчи лигада 15 команда ат салышты.