Бек Борбиев: Гүлнур Сатылганованы камерага тартып, элге жарыялаган талантты сыйлабагандык

Кыргыз Республикасынын Эл артисти Бек Борбиев Гүлнур Сатылганованы токтотуп, анын эл адамы экенин эске албай камерага тарткан МАИ кызматкерлерине нааразычылыгын билдирди. Бул тууралуу анын соцтармактагы баракчасына калтырган маалыматына шилтеме берип "Барометр" билдирет.

“Алматыда болгон окуяны айтып берейин. Казак досторум былтыр коноктоп 2-3 күн сый көрдүм. Кечинде мейманканага келе жатсак МАИ кызматы токтотуп калды. Рулда белгилүү казактын маданият кызматкери эле. Кичине ууртап алган болчу, дароо эле билишти. Видеого тарткандар да жүрүшөт.

Аларда ичип айдагандарга жаза бизге караганда абдан катуу, акчалай штрафы дагы көп. Мен чоң  ызы- чуу болот окшойт деп, өзүмдү дагы күнөөлүү сезип турдум. Ошентип турсак эле, ары жактан командири түшүп келип, сылык саламдашып, рулга олтурду. Даректи сурап, мейманканага чейин айдап келди, мигалка машинеси алдыга түшүп коштоп алган.

Келген соң, биз дагы кечирим сурап аттык, чынында уят болдук. Бирок тиги кызматкер баланын сөзү алигиче эсимде. Байкелер, биз казактын маданиятын көтөрүп жүргөн адамды сыйлай албасак, баалай албасак, анда казактын мыйзамынын кимге кереги бар? “Жакшы эс алыңыздар” деп, камерадагы запистерин өчүрүп кетип калышты.

Гүлнур Сатылганованы кармап,  маашырланып камерага түшүргөндөрдү көрүп, ошол окуя эске түштү. Албетте,  мыйзам баарыбызга бирдей, бирок коңшу туруп, эки башка ойлонгон эл экенбиз дедим”, - деп жазды Борбиев.