Баткенде мыйзамсыз товар ташыган мандарин сүйүүчүлөр кармалды

Мамлекеттик бажы кызматынын кызматкерлери ЕАЭБдин бажы аймагына 11 тоннадан ашык мандаринди мыйзамсыз ташып келгендерди кармады. Бул тууралуу аталган мекеменин басма- сөз кызматы бүгүн, 8 февралда билдирди.

Маалыматка ылайык, ЕАЭБдин Бажы аймагына товарларды жана транспорт каражаттарын мыйзамсыз ташып кирүү фактыларын табуу жана бөгөт коюу боюнча жүргүзүлгөн ыкчам иш-чаранын жүрүшүндө “Баткен” бажысынын кызматкерлери тарабынан Баткен облустунун Баткен районуна караштуу Чон-Талаа айылында ЕАЭБтин бажы аймагына мыйзамсыз товар ташууга шектелип Кыргыз Республикасынын жараны К.Э. аттуу жарандын башкаруусундагы “МАН” үлгүсүндөгү жүк ташуучу унаа токтотулуп текшерүүгө алынган.

“Автотранспорт каражаттынын жүк ташуучу бөлүгүн текшерген учурда бажы контролунан тышкары ЕАЭБтин аймагына бажыга тийиштүү документтери жок, жыгач үкөктөргө салынган “ARSHAD AMEER ENTERPRISES” маркасындагы “мандарин” табылган. Кармалган товардын жалпы салмагы 11700кг., жана орточо базар баасы 526 500 сомду түзөт”, -  деп билдирди Бажы кызматы.

Аталган факт боюнча чогултулган материалдар тергөөгө караштуулугу боюнча Баткен областынын прокуратурасына өткөрүлүп берилди.