Атактуу ырчы, "I like to move it" ырынын автору Эрик Морилло каза болду

Дүйнөгө "I like to move it" атуу ыры менен атактуулуктун туу чокусуна жеткен ырчы, диджей жана продюсер Эрик Морилло 1-сентябрда каза болду. Бул тууралуу TMZ агенттигине шилтеме берип “Барометр” которду.

49 жаштагы ырчынын денеси Майами-Бич шаарындагы үйүнөн табылган. Өлүмдүн чоо-жайы азырынча тактала элек.

Эрик Морилло быйыл августтун башында зордуктоого шектелип кармалып, күрөөнүн эсебинен бошотулган. 4-сентябрда алгачкы сот отуруму болмок.

Анын "I like to move it"  ыры токсонунчу жылдары хит-параддарда алдыңкы орундардан түшпөй турган.

Морилло престиждүү "DJ Awards" сыйлыгына алты жолу татыктуу болгон. Үч жолу "Эң мыкты эл аралык диджей", үч жолу "Мыкты диджей" наамын алган.