Журналист: Акын Болот Назаров тууралуу чындыкты ырчы Кубанычбек Ажыбаев билип унчукпай отурат

Төкмө акын Болот Назаров үч күндөн бери дайынсыз болуп жатат. Бул тууралуу журналист Олжобай Шакир соцтармактагы баракчасына жазган маалыматка таянып “Барометр” билдирет.

Анын айтымында, акынды ырчы, тамада Кубанычбек Ажыбаев тойго чакырып барган.

“Анан акынды той ээсин мактап ырда дегенде, акын баш тартып чыгып кеткен. Болот ошондон бери дайынсыз. Телефонун да тойканага унутуп кетиптир деп жатышат. Назаров тууралуу чындыкты билсе да Ажыбаев унчукпай отурат.

Эми 3 күндөн бери Болот Назаровдон дайын жок. Бокени далыга таптап, тойго ырдап бер деп ээрчитип барган Кубанычбек Ажыбаев дешет. Оозуна талкан сугунгансып, үндөгүсү жок анын. Иштин чоо-жайын ошол "тилин жутуп алган" өнөрпоздон билсек дегенбиз...

Бирок Болот Назаров боюнча 3 күндөн бери кабар жок үчүн коомчулукка болгон иштин учугун чыгарып турганды оң көрдүк. Себеби, бири айтат: "Бокени Беловодский милийсасында камап коюшуптур". Бири айтат: "Бокени тойго чакырткандар алдына ат тартып мингизишет...Тата-пата" Анан эле ошол мингизген ат эртеси уурдалган жылкы болуп чыгат. Болгондо да аны Болот Назаров уурдап алган имиш!

Кыргызда илгертен өнөр адамынын алдына жылкы тартып, үстүнө чапан кийгизип сый көрсөткөн кыргыздын бул кандай "жаңы салты" болуп кетти экен деп баш катырып отургандагы кезибиз”, -деп жазды журналист.

Ал эми, Москва районунда бирөөнүн жылкысын тартып алууга шектүү катары Болот Назаров кармалганын милиция кабарлады.