Акылбек Жапаров: Кредит жана гранттык келишимдер мамлекеттик тилде түзүлүш керек

Жогорку Кеңештин “Бир Бол” фракциясынын депутаты Акылбек Жапаров Кыргызстан менен башка каржылык институттар же донорлор менен түзүлгөн келишимдер жалан гана чет тилде эмес, кыргыз жана орус тилинде түзүлүшү керек деп эсептейт. Ал демилгелеген  «Кыргыз Республикасынын эл аралык келишимдери жөнүндө» мыйзамга өзгөртүү киргизүү тууралуу мыйзам долбоору парламент жыйынында бүгүн, 23 январь күнү каралды

“Кыргыз тарапка мамлекеттик зайымдарды (кредиттерди, гранттарды) берүү жөнүндө донорлор жана (же) эл аралык финансылык институттар жана уюмдар менен Кыргыз Республикасынын эл аралык келишимдерин түзүү учурунда тараптар үчүн бирдей шарттарды камсыз кылуу  керек. Башкача айтканда ал келишимди милдеттүү түрдө тараптардын тилдеринде,  чет өлкөлүк жана расмий тилдерде түзүүнү карайт”, - деп билдирди мыйзам долбоорунун демилгечиси.

«Кыргыз Республикасынын эл аралык келишимдери жөнүндө» мыйзамдын 4-беренесине ылайык тараптардын макулдашуусу боюнча эл аралык келишимдер келишимдин катышуучусунун тилинде, башкача айтканда чет тилде түзүлүшү мүмкүн экендиги каралган.

Депутаттын айтмында, мында мыйзамда түзүлүүчү эл аралык келишимдин мамлекеттик же расмий тилдеги версиясы болууга тийиштиги жөнүндө баяндалган эмес. Расмий котормосунун жоктугу же түзүлүүчү эл аралык келишимдин мамлекеттик жана расмий тилдеги версиясынын болбоосу түзүлгөн келишимдин укук ченемдүүлүгү жөнүндө көп сандаган суроолорду жаратат. Ушуга байланыштуу аракеттеги мыйзамдын “эл аралык келишимдер мамлекеттик жана расмий тилдерде, ал эми айрым учурларда келишимдин катышуучуларынын тилинде – мамлекеттик жана чет элдик же расмий жана чет элдик тилдерде жүзөгө ашырылат, мында эл аралык келишимдердин көрсөтүлгөн тексттеринде айырмачылыктар болгон учурларда, мамлекеттик же расмий тилдердеги текст түп нуска болуп эсептелет деген толуктоо киргизүү сунушталат

Талкуунун жыйынтыгында мыйзам долбоору 1-окууда добуш берүүгө жиберилди.