Баткенде өзгөчө кырдаал учурунда иштеп жаткан укук коргоо органдарынын иши текшерилди

29-30-апрель күнү вице-премьер-министр Акрам Мадумаров, ички иштер министринин биринчи орун басары, милициянын генерал майору Сүйүн Өмүрзаков Баткен областынын Лейлек, Баткен, Кадамжай райондорунда, Кызыл-Кыя шаарында жана Ош областынын Ноокат райондорунда укук коргоо органдарынын, күч түзүмдөрүнүн, чек ара кызматтарынын жана мамлекеттик мекеме-уюмдарынын өзгөчө кырдаал убагындагы ишмердүүлүгүн көзөмөлгө алуу менен бирге аткарылып жаткан иштердин сапаты, коронавирус илдетин жоюу жана таркалып кетүүсүнө бөгөт коюу боюнча аткарыла турган иш-чаралар менен жакындан таанышты. Бул тууралуу ИИМдин Басма сөз кызматы билдирди.

Алар кыргыз-тажик мамлекеттик чек арасындагы көзөмөлдү күчөтүү максатында Лейлек районундагы Интернационал айылындагы жана «Кайрагач» көзөмөл-өткөрүү жайларына барды. Акрам Мадумаров менен Сүйүн Өмүрзаков бул пункттардын ишин көрүп, санитардык-эпидемиологиялык жана башка текшерүү чараларын күчөтүү боюнча бир катар тапшырмаларды берди.

Ошондой эле, вице-премьер-министр чек арага чектеш жайгашкан Жаңы-Жер жана Кулунду айыл аймактарына барды. Ал чек арага чектеш райондорду өнүктүрүүнүн мамлекеттик программасынын айрым пункттарын ишке ашыруунун жана жазгы талаа иштеринин жүрүшү менен таанышты.

Вице-премьер-министр Акрам Мадумаров тармактык мамлекеттик органдарга жана жергиликтүү өз алдынча башкаруу органдарына бир катар тапшырмаларды берди.
Айрыкча Баткен областындагы чек ара өтмөктөрүндөгү санитардык-карантиндик эпидемиологиялык посттор, ал посттордо кызмат өтөп жатышкан кызматкерлер менен медиктердин ишмердүүлүгүнөн кабар алып, аларга өз милдеттери кынтыксыз аткаруу туурасында тармактык мамлекеттик органдарга жана жергиликтүү бийлик органдарына тапшырмалар коюлду.